بورادا قار یاغیر
چیسگین لیک قوجاغیندا آغاجلار
به به لر کیمی
اوشویور اللری
ایستکلری بوز بولاغی
و من
اوجسوز بوجاقسیز دیله مه لرین سونو
شعیر اولاجاق بیر گون
بو دورد دووار آراسینداکی ایستی دن
سویوقدا کیریمیش اللریم.
گؤزلریمیزی،
یوخویا اویدوردولار.
قولاقلاریمیزی
یئله
و سن امکداشیم،
دیلینی دیشله ین گوندن،
لال اولوبسان.
گؤزلری وولقان پارتلاییشینی گؤزله ییردی
دوداقلاریندا نیفرت چالخالانیردی
و اوره یینده
بیر اورمان جا، شله لنمیش اوجاق یانیردی
تیتره مه دی
اسمه دی
آنجاق اؤلدو
اؤلوموندن سونرا من
گؤزلرینی اوپدوم
دوداقلارینی دیشله دیم
و اوره یینده
ابدیلیک یاشادیم.
ایچیمده بیر حسرت یاشاییر
سنین کیمی
کوکسومه آیاق قویمادان
تاخیل بئینیمه
ای یاشیلیغین یانغینی
بو تارلا سنین
یا بیچ یا یاندیر
بو پئنجره نین دالیندا پوشه لنمیش یارپاقلار
سنین کیمی سولورلار
ان کیچیک بارماغیمدا سنه باخیر
و گولور
هیرسدن آلوو قالخا کاش
یاندیرا
منی
بارماقلاریمی
و....
اؤلوم اؤلوسو
و قزئتلرده یایلان
گؤز قیرپیمیندا یئرلشن جه دیریلیک.
بیز دئییریک
سیز دئییرسینیز
و اونلار
دیشلرینی قیچیردامیش؛
یوزمین یوز،
اونلار.
بیر گون اؤلوم گیره ر جانیما
و سن
حسرتلی قاپالی گؤزلریمین اؤنونده
دورارسان یالنیزجاسینا
اوندا حیاتیم قده ر آجییارسان سنده
دوشلریندن سود آخار
گؤزلریندن قان
ساچینی یولارسان.
منده نیفرت شرابینی ایچیب
کئفلیلر کیمی اولاشارام سنه.
اوندا بیلرسن
آللاهین اؤلوب
اوندا بیلرسن،
منی
گئت گوزومون اونوندن اولمه میشدن اونجه
سنی دای بیلمه سین، بو سرسفیل باخیشلار.
ده لییم زیر ده لی دیین دوداقلار.
یومروغا دونموش بارماقلار.
گولوم دییه جکدیم سنه
دییلیم بوروشدو
سارام دییه جکدیم
سئللره قوووشدو.
بو تومورجوقلانمیش کؤکسومده کی چیچکلر
پوشله نیب نیفرت اودونا
هادی! دیله گل
چاغیر آمبولانس لاری
اولاسینلار چاققال کیمی جنده ییمه
داراشسینلار قلبیمه
سورسونلار نفسیمی
بسله ییجی لره آدیمی آللاه دئی
قوی سنین کیمی باغریلاری چاتلاسین
آدیمی یازاندا داشا
سیز اؤلولره یاشام دییه
اؤزومه اؤلوم یاراتمامیشام
تییاترا قویموشدوم سیزی
تییاترین سونو
اؤلولره اؤلومده بیتر.
بو دنیزدن دوغولاجاق آتلار
دیرناقلاری شیشه
گوزلری گوی ماوی
آلینلاریندا سب- سرین حیات
سوروجولرین دوداغیندا هارای
باغیراجاقلار منی
دنیزده دیر درینلیییمیز
چاغیراجاقلار سنی
اوزوموزده دیر اوزوموز
داغلار
وولقان کیمی
قان- قان دئیه
پارتلایاجاقلار ایچلریندن
یاناجاق ایچیمیز ایچیمیزدن.
حیات!
باشلانمادی دئمک
باشلانمایاجاق بئله
بو گوزله ییشین سونوجو
تانریمیزین گوزلرینین سوکولوشودور.