بو هانسی ایبراهیم ، سینیق چلیگیله بوتلاری سیندیریر؟!؟

"تنقید" دئدییمیزه گوره هر نه یی قاریشتیریب سونرا ایسته دییمیزی اوندان دیشاری چیخارتماق و داها سونرا نئچه تانینمیش یازیچی و شاعیر دالیندا گیزلنمک اولسایدی کی، بیر-بیریمیزه سویوش وئردییمیزه تنقید دئیه ردیلر!. بیر شاعیر کی میللتینین دامارینی تاپا بیلیر یانی حکیم لیک بیلیر و  البت کی قان چکمکه یه ده باجاریغی اولور و اونون ایچین سئویلیر دئمک. بو گئرچک و یا سوچ اولورسا دین عالیملری اوندا حوکوم وئره جکلر. بیز اینسانلارین اوزل شخصییتینی(اوزونو) تنقید شیللاق ایله چالیریق، یادا یاراددیقلارینی(اثرلرینی). تنقید شیللاغینی کیم گوروب کی اؤلونون جانسیز، دیلسیز بدنینه چالارلار!. آخی شهریارین 49 یاشینا دک سوبای قالماسی، شهریارین بو قدر شعرینین سئویلمه سینه نئجه آرتیر؟!

شهریارین آدی و شعرینین اوخونولوب سئویلمه سینین قورخونج کابوسوندان قورتولمایانلار، اونو و اونون کیمی شاعیرلری تانیغیندان گون به گون اوزاقلاشماقدادیلار. دئمک بو نوستالژی سئون، میللت دیر، نوستالژی یازیب یارادان شاعیرینی سئویر. آخی نئدندیرکی بیز دونیا ادبیاتی دنیزیندن گونده بیر قیزیل بالیق تورا سالان شاعیرلر، هله شهریارین شعر نهنگینه بالیق یئمیده اولمامیشیق!!

بیر ناغیل کیمی اویود یادیما دوشدو " بیرگون بیر بالاجا جوجوق جیلاز جیغاز یازار، بیر آدلیم و قوجامان یازارین چیگینینه چیخیب من بو بویوک یازاردان اوجادایام دئییردی."

بو گئنیش لیکده دنیز، سنده بالیق، اودا بالیق و شهریاردا قوجامان اولدوغونا گوره بالیق یئییب یئکه لیب نهنگ کیمی، نه قدر اوزورسن اوز، قول قانادین شهریارا دولاشیرسا سوچ سنده دیر. شهریار بتونو سیندیرماق اونون شعیر باجاریغینا توخونماق دئییل.