ثانییه میلینه اوخشادیرام
او قده ر
تئز دویاجاقسان منی.
بیر تورکودور گؤزلرین؛
اوخویار جانیمی.
دوداقلارینین ترپه نیشی،
چیرپیندیرار اوره ییمی.
گؤزلرینی یومسانا
دوداقلارینی…
من اؤلوم دایان،
قوی دویونجا گوروم سنی.
اونون ماوی خزره بنزر گؤزلرینده
سیلیت- سیلیت باخیشلار،
آغلاییردیلار.
سوردوم نه اولوب دئی؟
دئدیلر:
بیر آخشام شاعیرین گؤزونون اونونده
چیراغی بوغدولار.
گؤزلری وولقان پارتلاییشینی گؤزله ییردی
دوداقلاریندا نیفرت چالخالانیردی
و اوره یینده
بیر اورمان جا، شله لنمیش اوجاق یانیردی
تیتره مه دی
اسمه دی
آنجاق اؤلدو
اؤلوموندن سونرا من
گؤزلرینی اوپدوم
دوداقلارینی دیشله دیم
و اوره یینده
ابدیلیک یاشادیم
سوسدوراجاقلار شعیرلرینی
سنی
ایناندیراجاقلار، اینانمادیقلارینیدا
آما سن
اؤزلویوندن باشقا قوسا بیلمه یه جکسن.
اوره یین بولانماسین
گیجه للنمکدن اؤزلرینی تاپا بیلمه ین اینسانلار
قوسوب
یالاییب
یاشاییبلار
آنجاق سن بو سئودانی
اوره یینده ساخلا.
سنسیز تومورجوقلانمیش آرزیلاریم
بوینو بوکوک
ده ده سیز بیر اوشاق کیمی
سیرتیلاجاق کوچه بازاردا اوزلری
آرا بیر آزاجاقلار تموز گئجه سینده سویوقدان
قیوریلیب پوشلنه جکلر
سنسیز عوصیانا چارپان دیشلریم
قودلاناجاقلار
قورخودان قوخاجاق ایچلری
بویور
گئدیرسن اوزاقلارا گئت
عوصیانکارا الوداع دئمزلر
سنسیز سالاما ترپنن قولاقلاریم
دولورلار هوی هویا
قوی بو فلاکت یاغمورو آلتیندا
یالنیز من ایسلانیم.
گلیشه جک بیر گون یالنیز
بو شعیرلر
آخشام چاغیندا
ایسیندیر اللریمیزی گونش!
کیریمیشیق ایکیمیزده
سوپ- سویوق کونوللریمیز
گوزلریمیز بیر – بیریمیزین
دالیندا آسیلی
دالبادال قاداقلایان یاسالار
سنی
منی
بیزی
قاداقلایاجاقدیر.
تکجه اولوم
آرزیلاریمین بیچیمینده
تکجه سن
کونلومون ایچینده
اونوتما بو آنیلار سوره سینده
آیریلمایاجاقلاریمیز وار
اولوم بیر حیات باغیشلاناجاغی
و سن
ومن سندن ایجیمه دن ده
اولوم آرزیلاریمین بیچیمینده .
بو گون دوغوم گونوم
یارین یاشام
سیراغا گون دوغولمامیشیم آنی
یئنه ده اولوم
آرزیلاریمین بیچیمینده
یئنه ده سن
کونلومون ایچینده
گئتدین!
گلمه یینجه آخشامجیکلار
بویویه جک آرتیق
قارانلیق!
قارا اورتویون اورتور اوستوموزه
سن گئتدین!
گئدیشیندن چوخ اوزون زامان گئچدی
گلمه دین
جـــــــــــــهـــــــــــــــنــــــــــمــــــــــه.
نه وارلیق
نه یوخلوق
نه سنلیک
نه سنسیزلیک
فرقینده اولمادیغیمدیر
اولورسا
وار اولدوغوندا
منسیزلیکلرین فرقینده اولما سنده.